A Maria d’’e Ggrazie di rosario di nota luglio 2022
E ttorna n’ata vota ‘a festa antica;
ô prufumo pe ll’aria,ll’alleria,
ceste ‘e rose addorano int’ê viche
schioppànno a ccentenara pe Mmaria!
‘A campana abbascio ‘a sta marina
sona sbattènno forte comm’ ô viento,
scenne ‘a cielo na vesta ‘e seta fina,
e tte salutano sunanno ‘e bbastimente.
‘A primma dummeneca –
è Lluglio ‘o mese-
nun appena p’’e
Cuonte
‘o sole sbrenne,
se ‘nquatra ‘a prucessione ‘ncopp’ê ttese
e ttu si’ Mamma ca ‘a cchisti figlie ‘ntenne.
Pe mmiezz’ê strade,tutte aparàte ‘a ffesta,
puorte ll’ammore e Nninno tiene ‘mbraccio,
cuperte culurate,bannère p’’e ffeneste,
nu chiarore ‘e cielo t’allummèna ‘sta faccia.
E tte chiammàno ‘e malate,’e mmamme ‘npena
‘o navegante ca a mmare conta ll’ore,
chi fa nu vuto, e Ttu’ d’‘a terra tiène,
ogni prumessa ‘nzerrata int’ ô core .
Ne so’ passate secule e mmaje te si’ stancata
‘e stennere pe nnuje ‘sti mmane sante
pe ddicere:“Sto cca’ state sicure,mi site figlie
io v’accuntento cu ‘e ggrazie ‘a tuttequante!”
E tanta ggente te saluta pe ste vvie
è scesa ancora notte a ncopp’ ô Chiano
prustrate ‘e piede tuje,chiamma ‘a
Mmaria
assieme o’ core tujo canta Cassano!
E sso’ venute a cchiorme mmiez’ ô mare
sti vvele azzurre arricamàte ‘e stelle
ca vocano cu ll’onne, so’ mmigliara,
arrèto ‘a na ciangiola arranca ‘
a lanzetella
.
E mmentre ‘a prucessione gira e ttorna
cu ‘o fummo d’’e bbotte,cante e ssuone,
‘e gabbiane appriesso vulanno a stuorme,
’o mare bennedice e ssi’ Ppadrona.
E pe tutto ‘o paese se spanne na priezza
antica e semplice,quase fatte ‘e niente,
Forte e singera ,astretta comm’â rrezza
E Ttu d’’a feda nosta si’ccuntiento.!
